NAVOIY DAVLAT KONCHILIK VA TEXNOLOGIYALAR UNIVERSITETI REKTORI B.T.MARDONOVNING YANGI YIL TABRIGI!

Aziz do‘stlar!

 

        Avvalambor barchangizni kirib kelayotgan yangi — 2023-yil bilan samimiy muborakbod etaman!

Darhaqiqat, qizg‘in va taassurotlarga boy kechayotgan joriy yilimiz tobora yakunlanar ekan, bu davr mamlakatimiz hamda jamiyatimiz uchun bir qator muvaffaqiyatlar tuhfa etdi, desak mubolag‘a bo‘lmaydi! 

“Inson qadrini ulug‘lash va faol mahalla yili”ni yakunlab “Insonga e’tibor va sifatli ta’lim yili”ga qadam qo‘yayapmiz.

Xabaringiz bor, ushbu tashabbus Davlatimiz Rahbarining Oliy Majlisga va O‘zbekiston xalqiga Murojaatnomasida yangradi. Darhaqiqat, mazkur nutqda bildirilgan har bir taklif barchamiz uchun  muhim ahamiyat kasb etadi. Jumladan, ta’lim, madaniyat, ishlab chiqarish, tadbirkorlik va boshqa sohalarda kelgusida amalga oshiriladigan tub o‘zgarishlar mamlakatimizning bugungi va kelgusi taraqqiyotida yuksak samara beradi. Boisi, Yurtboshimiz tomonidan ilgari surilgan tashabbuslarning zamirida bugungi global dunyoda kechayotgan jarayonlar kun tartibiga olib chiqayotgan dolzarb masalalar yechimi, qolaversa xalqimizning xohish-istaklarini ro‘yobga chiqarishdek ulkan maqsad yotibdi. 

Qolaversa, 2023-yilga yurtimizda “Insonga e’tibor va sifatli ta’lim yili” deb nom berilishi ta’lim sohasi vakillari zimmasiga ham ikki karra mas’uliyat yuklashini unutmaslik kerak!

Zero, O‘zbekistonda olib borilayotgan davlat siyosatining markazida inson va uning manfaatlarini ta’minlashdek ustuvor vazifa turibdi va bunga avvalo sifatli ta’lim, ya’ni bilimli, yuksak ma’naviyatli hamda raqobatbardosh kadrlarni yetishtirish bilan erishiladi.

 

Qadrli yurtdoshlar!

Shuni alohida ta’kidlamoqchimanki, yakunlanayotgan 2022-yil oliygohimiz hayotida ham unutilmas va tarixiy jarayonlarga boy yil bo‘ldi. Jumladan, “Navoiy davlat konchilik va texnologiyalar universitetini tashkil etish to‘g‘risida”gi Prezident qarori asosida yangi oliygoh tashkil etilgani mening, qolaversa mana shu dargohda uzoq yillardan buyon samarali mehnat qilib kelayotgan ustozlarning ko‘p yillik orzu-umidlari, sa’y-harakatlari ro‘yobi sanaladi.

Oliy ta’lim muassasalarining milliy reytingida qadrdon universitetimiz bugungi kunda — beshinchi, oliy ta’lim muassasalari filiallari reytingida esa NDKTU Nukus konchilik instituti uchinchi o‘rinda turibdi. Texnika va qishloq xo‘jaligi sohasi bo‘yicha oliy ta’lim muassasalari reytingida esa universitetimiz kuchli uchtalikdan o‘rin olgan.

Shuni alohida e’tirof etish kerak, universitet huzuridagi akademik litseyimizning matematika fani o‘qituvchisi Gulchehra Ulug‘berdievaning Davlat Rahbarimiz tomonidan “Shuhrat” medali bilan taqdirlangani yana bir muhim natija bo‘ldi.

Bugungi kunda universitet nufuzini oshirish borasida yosh o‘qituvchilarimiz hamda olimlarimiz tashabbuslari meni yanada quvontirmoqda. Joriy yilda ana shunday yosh va o‘z ustida tinimsiz izlanish olib borayotgan ikki nafar yosh olimining “Mard o‘g‘lon“ davlat mukofotlari bilan taqdirlangani erishilgan e’tirofli  natijalarimizdan yana biri sanaladi.

Bundan tashqari, universitet huzuridagi ilmiy darajalar beruvchi yangi ilmiy kengash rasman faoliyatini boshlagani, “Zarafshon vohasini innovatsion kompleks rivojlantirish: yutuqlar, muammolar va istiqbollar” mavzusida uchinchi bor o‘tkazilgan xalqaro konferensiya joriy yildagi eng muhim natijalarimizdan sanaladi.

Ayni vaqtda universitetning ilmiy salohiyati 49,5 foizga yetkazilib, fan doktorlari soni 32 nafarni va falsafa doktorlari soni 100 nafardan ortiqni tashkil etmoqda. Kelgusi yilda bu borada o‘sish sur’atlarini yanada jadallashtirish, ta’lim sifatini oshirish oldimizda turgan eng muhim vazifa sanaladi.

Joriy yilimiz yakunida Oliy va o‘rta maxsus ta’lim vazirligining tegishli buyrug‘i bilan 2022-2023 o‘quv yili uchun respublika oliy ta’lim muassasalari  iqtidorli talabalari va doktorantlariga O‘zbekiston Respublikasi Prezidenti va nomli davlat stipendiyalari tayinlandi. Ular orasida  Navoiy davlat konchilik va texnologiyalar universitetining  1 nafar bakalavriat ta’lim yo‘nalishi talabasi va 1 nafar doktoranti O‘zbekiston Respublikasi Prezidenti stipendiati bo‘lgan bo‘lsa,  3 nafar talaba nomli davlat stipendiyalari sohibi bo‘lgani hamda universitet huzuridagi Nukus konchilik institutining 3 nafar talabasi  ham stipendiat bo‘lgani Yangi yil arafasida barchamizni xushnud etdi.

Bundan tashqari, 2022-yilda bir qator talaba, magistr, doktorant va o‘qituvchilarimiz qo‘shma ta’lim dasturlari hamda o‘zaro hamkorlik memorandumlari asosida dunyoning 10 dan ortiq mamlakati — Rossiya, Yaponiya, Ispaniya, Belorussiya, shuningdek qardosh qo‘shni davlatlarda   stajirovkalar o‘tib qaytishdi. Resublika miqyosidagi va xalqaro miqyosdagi qator tanlovlarda yosh olimlarimiz o‘zlarining ilmiy maqolalari bilan ishtirok etib g‘olbilikni qo‘lga kiritdi.   

 

Muhtaram do‘stlar!

Tobora yakunlanayotgan 2022-yil yuqorida tilga olingan ana shunday e’tirofli yutuqlar bilan xotiralarimizda qolmoqda!

Fursatdan foydalanib, Sizlarni yana bir bor Yangi yil bayrami bilan qizg‘in qutlagan holda har biringizga 2023 — “Insonga e’tibor va ta’lim sifatini oshirish” yilida yangi muvaffaqiyatlar tilayman!

Oilalaringizdan qut-baraka, xonadon-laringizdan baxt-u saodat hech qachon arimasin!