XALQIMIZ TASHABBUSI VA SHIJOATIGA TAYANILGAN KENG KO‘LAMLI ISLOHOTLAR SAMARASI HAM ULKAN BO‘LMOQDA

Davlatimiz Rahbarining Oliy Majlisga va O‘zbekiston xalqiga Murojaatnomasi har birimizning hayotimizda tarixiy sana sifatida muhrlanib qoladi. Ushbu  muloqot chog‘ida Yurtboshimiz tomonidan ijtimoiy-siyosiy hayotimizning barcha jabhalarini qamrab olgan qator takliflar, xususan ta’lim, tibbiyot, sud-huquq, prokuratura, moliya, madaniyat va boshqa sohalarda ilgari surilgan tashabbuslarning har biri alohida ahamiyatga ega. Eng avvalo, 2023-yilga yurtimizda “Insonga e’tibor va sifatli ta’lim yili” deb nom berilishi bu nafaqat ta’lim, balki barcha soha vakillari dilidagi gap bo‘ldi!

  Darhaqiqat, yurtimiz aholisi soni 36 milliondan oshdi. Mamlakatimiz Rahbari ta’kidlaganidek, har yili mazkur raqam o‘rtacha 900 mingtaga oshmoqda. Bu esa amalga oshirilayotgan islohotlar ko‘lamini, yaratilayotgan ish o‘rinlari sonini, mahallalarda oilalarga ko‘rsatilayotgan ijtimoiy-iqtisodiy ko‘mak hajmini tobora oshirib borishni ham taqozo etadi. Yurtboshimiz bunga to‘xtalar ekan, g‘oyat murakkab va sinovli davrda mazkur masalalar eng birinchi vazifa sifatida belgilab olinganligini ta’kidlab o‘tdi. “Ushbu davrda to‘plagan tajribamiz bir haqiqatni yaqqol isbotlab bermoqda: taraqqiyot – faqat va faqat jasoratli mehnat orqali bo‘ladi!”, dedi Prezidentimiz.

Bugun xalqimiz nimani, qanday o‘zgarishlarni istamoqda? Muhtaram Yurtboshimiz  ayni shu masala yuzasidan olib borilgan tahlillarni tilga olar ekan, maktab, bog‘cha va shifoxonalar sonini ko‘paytirish, ta’lim va tibbiyot sifatini yanada oshirish, mahallalarda yo‘l, suv, elektr, transport muammolarini hal etish bugungi kunning o‘ta zarur va muhim vazifalari ekanligini qayd etdi. Bundan tashqari, joylarda qo‘shimcha ish o‘rinlari yaratish, tadbirkorlikni yangi imkoniyatlar bilan ta’minlash, bu sohadagi ovoragarchilik, byurokratiya va korrupsiyani to‘la yo‘q qilish ham xalqimiz roziligi yo‘lidagi zarur ilohotlar sanalishi aytildi. 

Shubhasiz, O‘zbekistonda olib borilayotgan davlat siyosatining markazida inson va uning manfaatlarini ta’minlashdek  ustuvor vazifa turibdi va bu quyi tizimlardagi har bir rahbar zimmasiga ham katta mas’uliyat yuklaydi.  Yurtboshimizning “Aslida ham, bizning eng bebaho boyligimiz, bu – bunyodkor xalqimiz, duogo‘y ota-onalarimiz, navqiron avlodimiz emas-mi?”, deya ta’kidlagani bejiz emas.

Hech kimga sir emas, har bir mamlakat taraqqiyotining o‘zagi eng birinchi navbatda ta’limning sifatiga, yetishtirilayotgan kadrlarning raqobatbardoshligiga borib taqaladi.  Jahon siyosati markazlaridan biriga aylanayotgan yurtimizda ham asosiy e’tibor Yangi O‘zbekiston uchun eng katta investitsiya bo‘lgan ta’limni qo‘llab-quvvatlashga qaratilgan, desak xato emas. O‘qituvchilarning maqomini oshirish borasida amalga oshirilayotgan sa’y-harakatlar, jumladan bu masalani Konstitutsiyada mustahkam belgilash yuzasidan qilinayotgan o‘zgarishlar tahsinga loyiq!

Murojaatnomada qayd etilganidek, kelasi yildan boshlang‘ich sinflarda mutlaqo yangi metodika asosida yaratilgan darsliklar bo‘yicha o‘qitish yo‘lga qo‘yilishi yana bir muhim yangilik sanaladi. Milliy ta’lim tizimida farzandlarimizning qobiliyatini rivojlantirishga, kreativ fikrlashni rag‘batlantirishga, boshlang‘ich ta’limdanoq xorijiy tillarni o‘qitishga, zamonaviy texnologiyalarni o‘zlashtirishga e’tibor  qaratilayotgani, kelgusida oliy ta’limda dunyoda raqobatbardosh kadrlar tayyorlash samarasini bir necha karraga oshiradi, albatta.

Murojaatnomada 700 dan ortiq kasb-hunar maktabi, kollej va texnikumlar imkoniyatidan samarali foydalanish zarurligi ham ko‘rsatib o‘tildi. Bu maqsadda 2023-yildan boshlab yangi dastur amalga oshiriladi. Har bir viloyatda 1 tadan texnikumda Yevropa kasbiy ta’lim standartlari joriy etiladi. Kimyo sanoati, elektrotexnika, transport va energetika sohalarida nufuzli xalqaro tashkilotlar bilan birga, alohida Muhandislik maktablari tashkil qilinadi. Bu yangilanishlarning konchilik, kimyo-texnologiya, qishloq xo‘jaligi kabi sohalarida yosh mutaxassislar yetishtirib kelayotgan bizning oliy ta’lim muassasamiz uchun ham ahamiyati katta. 

“Odamlarimizning tashabbusi, shijoati va salohiyatini ishga solish uchun barcha sharoitlarni yaratish asosiy vazifamiz bo‘lishi kerak”, deya ta’kidlandi Murojaatnomada. Albatta, barcha takliflar bugungi va kelgusi o‘zgarishlar avvvalo, xalqimizning orzu-umidlari, xohish-istaklari bilan hamohang bo‘lishini ko‘rsatadi. Yurtimiz ahli o‘z oldiga ulkan maqsadlar qo‘ygan ekan, shubhasiz bahamjihatlikda ko‘zlangan yuksak natijalarga erishiladi.

Baxtiyor MARDONOV,

Navoiy davlat konchilik va

texnologiyalar universiteti rektori,

texnika fanlari doktori,