NAVOIY DAVLAT KONCHILIK INSTITUTINING 25 YILLIGI!

NDKI rektori, professor

 Quvondiq Sanaqulovning

Navoiy davlat konchilik instituti

tashkil topganligining 25 yilligiga

bag‘ishlangan nutqi

ASSALOMU ALAYKUM, AZIZ USTOZ-MURABBIYLAR,

QADRLI HAMKASBLAR!

Fursatdan foydalanib, Siz, aziz ustozlarni, ilm yo‘lida izlanishlar olib borayotgan professor-o‘qituvchilarni, institutimiz ravnaqi uchun o‘zining kamtarona mehnati bilan ulkan hissa qo‘shib kelayotgan barcha ishchi-xodimlarni, institut jamoasini Navoiy davlat konchilik instituti tashkil topganligga 25 yil to‘lishi munosabati bilan chin qalbimdan qizg‘in tabriklayman!

Har bir o‘quv yurtida ta’lim sifati masalasi, bu boradagi yangiliklar, yangi texnologiyalar bilan boyitilishi, ta’limning zamonaviy ishlab chiqarish bilan integratsiyalashuvi muhim ahamiyat kasb etmoqda. Ayniqsa, ushbu sinovli kunlarda pedagog kadrlarimizning ham mehnati e’tirofga molik, albatta.

Xabaringiz bor, kon va metallurgiya sanoat korxonalarini etuk va malakali mutaxassis kadrlar bilan ta’minlash maqsadida 1963 yilda Navoiy shahrida Toshkent politexnika institutining kechki o‘quv maslahat punkti tashkil etilgan edi. Kechki o‘quv maslahat punktida Fuqaro sanoat qurilishi, Noorganik moddalar texnologiyasi, Elektr ta’minoti, Metall qirqish va mashinasozlik texnologiyasi mutaxassisliklari bo‘yicha ta’lim berilgan.

1966 yilda kechki o‘quv maslahat punkti Toshkent politexnika institutining umumtexnika fakultetiga aylantirildi. Keyinchalik Navoiy umumtexnika fakulteti Toshkent politexnika institutining Navoiy filialiga aylantirilgan.

Navoiy viloyatida kon-metallurgiya sanoatini yanada rivojlantirish, foydali qazilmalarni qazib olish va qayta ishlash uchun zarur bo‘lgan etuk mutaxassis kadrlar tayyorlaydigan konchilik instituti O‘zbekiston Respublikasi Prezidentining 1995 yil 7 iyuldagi “Navoiy davlat konchilik institutini tashkil etish to‘g‘risida”gi Farmoni bilan tashkil topdi. Ushbu tarixiy sanaga ham bugun 25 yil to‘ldi.

Institutda o‘tgan davrda katta davovonlar zabt etilib, ilmiy salohiyati ham yildan-yilga yuksalib bordi. Xususan, Navoiy kon-metallurgiya kombinati davlat korxonasi tomonidan 2015 yilda institutining ikki ming o‘rinli yangi o‘quv binosini qurildi va zarur mebellar, o‘quv laboratoriya hamda axborot kommunikatsiya vositalari bilan ta’minlandi. Bugungi kunda yangi zamonaviy uskunalar bilan jihozlan Texnopark, u erda 6 million AQSH dollarga 109 turdagi zamonaviy o‘quv laboratoriya jihozlari sotib olib, o‘rnatildi. O‘zbekiston Respublikasi Vazirlar Mahkamasining 2018 yil 13 noyabrdagi 925-sonli qaroriga asosan Navoiy davlat konchilik institutining Nukus filiali tashkil etildi.

Institutimizda ishlab chiqilgan istiqbolli reja asosida har yili professor-o‘qituvchilar doktorlik dissertatsiyalarini muvaffaqiyatli himoya qilayaptilar. Jumladan, o‘tgan yili jami 20 nafar professor-o‘qituvchimiz dissertatsiya ishini muvaffaqiyatli himoya qilgan bo‘lsa joriy yilda 30 ga yaqin olimlarimiz himoyasi rejalashtirilgan.

Aksariyat dissertatsiya ishlari Navoiy kon-metallurgiya kombinatining 2026 yilga qadar mo‘ljallangan innovatsion rivojlanish dasturi asosidagi ilmiy-tadqiqot ishlari doirasida bajarilmoqda. Bir so‘z bilan aytganda, o‘tgan yillardan rozi bo‘lib, har qancha shukrona aytsak kam.

AZIZ USTOZLAR, QADRLI JAMOA!

Mana shu quvonchli damlarda barchangizni qutlug‘ sana munosabati bilan yana bir bor samimiy muborakbod etib, oilangizga tinchlik-xotirjamlik, baxt va omad hamda kelgusidagi mas’uliyatli va sharafli ishlaringizga ulkan muvaffaqiyatlar tilayman.