OLIMLARNING ILMIY IZLANISHLARI DAVOM ETMOQDA

Insoniyat boshiga tushgan ofat – koronavirus pandemiyasi davrida o‘quv jarayonlarini tashkil etishga asta-sekin tayyorgarlik ko‘rib borishga ruxsat berildi. Xususan, olimlar, ilmiy-tadqiqot institutlari xodimlari, professor-o‘qituvchilar sanitariya-gigiena normalarini ta’minlagan holda o‘z laboratoriya va kafedralarida kundalik ishlarini davom ettirishmoqda.

Navoiy davlat konchilik institutida konchilik, energo-mexanika, kimyo-metallurgiya fakul’tetlari hamda Nukus filiali mavjud bo‘lib, ulardagi 14 ta kafedrada jami 201 nafar professor-o‘qituvchi faoliyat yuritadi. Ulardan 20 nafari fan doktori, professorlar, 70 nafaridan ziyodi fan nomzodlaridir. Zamonaviy o‘quv-laboratoriya xonalari, auditoriyalari, kompyuter sinflari va server xonalari zamonaviy axborot-kommunikatsiya texnologiyalari bilan jihozlangan. NKMK Navoiy mashinasozlik zavodiga qarashli bino rekonstruksiya qilinib, “Texnopark” tashkil qilingan.

Bugun institutning barcha kafedralarida, laboratoriya xonalarida professor-o‘qituvchilar, yosh olimlar ilmiy faoliyatini davom ettirib, elektr energetikasi, texnologik jarayonlar va ishlab chiqarishlarni avtomatlashtirish hamda boshqarish, konchilik ishi, konchilik elektr mexanikasi, metallurgiya, mashinasozlik texnologiyasi va mashinasozlik ishlab chiqarishni avtomatlashtirish, kimyoviy texnologiya kabi sohalarda izlanishlarini olib boryaptilar.

 NDKI Matbuot xizmati