“KO‘HNA TARIX SHODASIDA...”

Tarix-poydevor. Kelajak-poydevor ustiga qurilgan va qurilayotgan qo‘rg‘ondir. Tarixni bilmaslik, uni qiziqib o‘rganmaslik, xato-yu kamchiliklaridan saboq, yutuqlaridan ibrat va kuch olmaslik, undan ruhlanmaslik, buyuk ajdodlarimizning ulug‘ ishlaridan faxrlanmaslik mumkin emas. Prezidentimiz Shavkat Mirziyoev ko‘rsatib bergan 5 tamoyil ham tarix va kelajakning omuxta mevasi, desak yanglishmaymiz.

Navoiy davlat konchilik instituti va Navoiy viloyati tarixi va madaniyati davlat muzeyining o‘zaro madaniy-ma’rifiy hamkorligi ancha yillardan buyon yo‘lga qo‘yilgan. 5 tashabbus doirasida bajarilayotgan ishlar ushbu hamkorlikning yanada mustahkamlashuvini ta’minladi, samaradorligini oshirdi.

2019 yilning 6 sentyabr kuni Navoiy davlat konchilik institutida Navoiy viloyati tarixi va madaniyati davlat muzeyining katta ko‘chma ko‘rgazmasi tashkil etildi. Muzey xodimlari Tursunoy G‘anieva, Gulchehra Jumaeva, Dilnoza Dodoevalar institut professor-o‘qituvchilari va talabalariga eksponatlar va ularning tarixiy ahamiyati haqida ko‘plab ma’lumotlar berishdi. Muzey bo‘lim boshlig‘i Dilafruz Mustafaeva biz bilan suhbatda jumladan shunday dedi:

- Vatanimiz mustaqillikka erishgandan buyon o‘tgan 28 yil vaqt mobaynida mamlakatimizda nafaqat siyosiy, iqtisodiy islohotlar va o‘zgarishlar, balki madaniy-ma’rifiy sohada ham bir qancha yangilanishlar bo‘ldi. Yoshlarimizning tarixga, muzeylarga bo‘lgan qiziqishini oshirish, ajdodlarimizdan meros bo‘lib kelayotgan qadim o‘tmishimizning osori atiqalari bilan yaqinroq tanishtirish, davlat rahbarining ko‘rsatib bergan beshta tashabbusi ijrosini ta’minlash, talaba yoshlarimizning kitobxonlikka, ayniqsa, qadim qo‘lyozmalarimizga qiziqishlarini orttirishni oldimizga maqsad qilib qo‘ydik. Bugun sizning institutingizda “O‘zbekiston davlat mustaqilligi” mavzusida katta ko‘chma ko‘rgazma tashkil etdik. Maqsadimiz, nafaqat o‘tgan 28 yil mobaynidagi tarix, balki yoshlarimizni qadim tarixga etaklash, ularni osori atiqalar orqali muzeylarga bo‘lgan hurmatini oshirish, qadim o‘tmish bilan yaqinroq tanishtirish, qadim qo‘lyozmalarga qizikishlarini oshirishdir. Muzeyimizda 8 ta bo‘lim mavjud bo‘lib, bugungi ko‘rgazmalarning har biridan bir qancha ekspozitsiyalarni namoyish etmoqdamiz. Bu ekspozitsiyalarimiz milliy ayollarimizning do‘ppilari, qadimga taqinchoqlari, Nurota kashtachilik maktabiga xos bo‘lgan kashta liboslar, mis ko‘zalar, mis oftobalar,qadimiy qo‘lyozmalar, muzeyimizning o‘zida tashkil etilgan quroqchilik va qo‘g‘irchoqlar yasash to‘garaklari a’zolari tomonidan yasalgan bir qancha ekspozitsiyalardir. Shuningdek, XYIII asr oxiri XIX asr boshlariga oid bo‘lgan qadim qo‘lyozmalarni ham namoyish etmoqdamiz. Muzey eksponatlari Xatirchi, Navbahor, Nurota tumanlaridan yig‘ilgan bo‘lib, bu hududlar tarixi Samarqand, Buxoro viloyatlari tarixi bilan chamcharchas bog‘liq.

Shuningdek, Navoiy viloyati tarixi va madaniyati davlat muzeyining ko‘chma ko‘rgazmasida Shayx Sa’diy asarlarining ko‘hna varianti ham namoyish etildi.

Navoiy davlat konchilik instituti matbuot kotibi 

Gulnoz Sattorova