“VAQT SIZNI KUTIB TURMAYDI..”

Navoiy davlat konchilik instituti rektori, O‘zbekiston Qahramoni Quvondiq Sanaqulovich Sanaqulov bugun, 2019 yilning 4 sentyabrida nishonlanayotgan qo‘shaloq bayram: O‘zbekiston Respublikasi mustaqilligining 28 yilligi va Bilimlar kuni munosabati bilan o‘tkazilgan Mustaqillik darsi hamda Bilimlar kuni tantanalarida shodiyonaga yig‘ilgan barcha professor-o‘qituvchilar, 1-bosqich talabalariga qarata shunday dedi. Darhaqiqat, o‘tgan fursat qaytib kelmas.

NDKI rektori Q.S. Sanaqulov yig‘ilganlarni Mustaqilligimizning 28 yilligi bilan tabriklar ekan, talabalarga o‘zining eng ezgu tilaklarini bildirdi. Institutga endigina kirgan talabalarga o‘qish va izlanishda tolmaslik barcha yutuqlarning garovi ekanligi, bunda vaqtdan unumli foydalanish lozimligi haqida kerakli maslahatlar berdi.

Shundan so‘ng, institutning Ijtimoiy-gumanitar fanlar kafedrasi mudiri Olmaxon Saidovna Haitova mustaqillik qadamlari, milliy tiklanishdan milliy yuksalishga tomon shahdam odimlayotgan zamonamiz kishilarining ilm-fan va ishlab chiqarishda ko‘rsatayotgan jonbozliklari, bu buyuk ishlarda hozirda ilm tolibi bo‘lgan talabalarning ham kelajakda o‘z hissalarini qo‘shishlari zarurligi; tarixiy boy madaniy meroslarimiz, ularni o‘rganish, o‘rgatish, yangi ilmiy kashfiyotlar, kon-metallurgiya sohasidagi nodir adabiyotlar, ularni tarjima qilish, keng kitobxonlar ommasiga etkazish jarayonlari hamda bugungi kunning qadri haqida o‘zining sermazmun ma’ruzasini tinglovchilarga etkazdi.

Institut prorektori Jamoliddin Toshqulovich Nazarov talabalarni bayram bilan tabriklar ekan, institutda yaratilgan shart-sharoitlar, o‘quv xonalari, Axborot-resurs markazi va uning faoliyati, laboratoriya xonalari haqida keng ma’lumot berdi.

O‘zbekiston Respublikasi mustaqilligining 28 yilligi va Bilimlar kuni bayram tantanalari davom etmoqda.

Navoiy davlat konchilik instituti matbuot kotibi 

Gulnoz Sattorova