NAVOIY DAVLAT KONCHILIK VA TEXNOLOGIYALAR UNIVERSITETIDA GERMANIYA KOMPANIYASINING O‘QUV MARKAZI TASHKIL ETILADI

Germaniyaning “Zeppelin GmbH” konserni tarkibidagi “Zeppelin Uzbekistan” kompaniyasi va Navoiy davlat konchilik va texnologiyalar universiteti bilan birgalikda tog‘-kon sanoati uchun mutaxassislarni tayyorlash maqsadida “Navoiy o‘quv markazi”ni tashkil etish bo‘yicha memorandum imzolandi. Ushbu menorandum NDKTU rektori Baxtiyor Mardonov hamda “Zeppelin Central Asia Machinery” kompaniyasi bosh direktori Mixail Kontsevenko tomonidan imzolandi.

Mazkur kelishuv xalqaro ta’lim standartlari darajasida yuqori malakali mutaxassislar tayyorlashni ta’minlash, o‘zaro manfaatli sohalarda ilmiy-texnikaviy va ta‘lim sohasidagi hamkorlikni yo‘lga qo‘yishga ko‘maklashish, ochiq ilmiy-texnik axborot va innovatsion texnologiyalar almashinuvi kabi vazifalarni maqsad qilgan. Endilikda Caterpillar o‘quv markazi bazasida Caterpillar va Zeppelin kompaniyalari vakillari ishtirokida ilmiy-uslubiy seminarlar, ilmiy-amaliy konferensiyalar, vebinarlar, ma’ruzalar  va boshqa tadbirlarni o‘tkazish rejalashtirilgan. Hamkorlik shuningdek, taʼlim va texnologiya sohasida qoʻshma taʼlim dasturlarini, qoʻshma ilmiy va ilmiy-texnik tadqiqotlarni ishlab chiqish va amalga oshirishga ham oid boʻladi.

– O‘zbekiston ta’lim sohasi rivojiga  hissa qo‘shayotganimizdan, tog‘-kon sanoatida malakali mutaxassislarni tayyorlashga ko‘maklashayotganimizdan mamnunmiz, — deydi “Zeppelin Central Asia Machinery” kompaniyasi  Bosh direktori Mixail Kontsevenko. — Korporativ ijtimoiy mas’uliyat bo‘yicha loyihalarimiz doirasida biz nafaqat yangi o’quv markazini moddiy-texnik jihozlash bo‘yicha yordam berishga, balki to‘plangan tajriblarimizni to‘liq o‘rgatishga  va o‘quv jarayonlarida faol ishtirok etishga tayyormiz. Qurilish, togʻ-kon sanoati, neft-gaz, energetika va qishloq xoʻjaligi uchun texnikalar ishlab chiqarish va yetkazib berish hamda texnik xizmat ko‘rsatish bilan shug‘ullanib kelayotgan kompaniya O‘zbekistonda 2002-yildan beri faoliyat yuritib kelmoqda. O‘zbekiston hududida mijozlarga xizmat ko‘rsatish maqsadida Toshkent, Zarmitan, Qarshi, Zarafshon, Uchquduq shaharlarida 5 ta xizmat ko‘rsatish markazlari mavjud. 

Navoiy davlat konchilik va texnologiyalar universiteti Axborot xizmati