Rektor tabrigi

QURBON HAYITI MUBORAK BO’LSIN!

Aziz hamkasblar!

            Sizlarni ezgulik, mehr-muruvvat va insonparvarlik ayyomi bo’lgan Qurbon hayiti bilan chin qalbimdan samimiy tabriklayman.

            Qurbon hayiti musulmon olamidagi eng muqaddas, muborak va ruhan poklanishga da’vat etguvchi ulug’ bayramdir. Bu kun yaqinlarimiz holidan xabar olib, bemor va keksalardan ko’ngil so’rash, ehtiyojmandlarga mehr-muruvvat ko’rsatish, gina-quduratlarni unutish, kechirimli bo’lish azaliy an’anaga aylangan. Ulug’ qadriyatlarni o’zida chuqur mujassam etgan bu ayyom boshqa savobli amallari bilan ham asrlar osha insoniyat qalbiga ezguliklarni ulashib kelayapti. Shuning uchun ham Qurbon hayitining hayotimizdagi o’rni va ahamiyati beqiyos, xalqimiz uchun ardoqli bayram hisoblanadi.

            Barchamiz ushbu ayyomga qizg’in hozirlik ko’rayotgan shu kunlarda yurtimizda pandemiya bilan bog’liq vaziyatni inobatga olib, O’zbekiston musulmonlari idorasi Ulamolar kengashining fatvosi e’lon qilindi. Unda hayit kuni yoshi ulug’ keksalar va bemorlar holidan xabar olish hamda muborak ayyom bilan tabriklashni aloqa vositalari orqali amalga oshirish, marhumlar haqiga qilinadigan duoi fotihalarni o’z xonadonida bajarish, fotihalarga borish hamda o’tganlarning qabrlarini ziyorat qilishdan saqlanish, qurbonlik go’shti ehsonlarini tarqatishda karantin talablariga qat’iy rioya etish, hayitni oila davrasida nishonlash tavsiya qilingan.

            Albatta, xalqimiz salomatligini o’ylab qilingan bu da’vatga itoat etish, pandemiya sharoitida o’zimiz, oila a’zolarimiz va yaqinlarimiz sog’ligini asrash har birimiz uchun ham farz, ham qarz amaldir.

Qadrli hamkasblar!

            Muqaddas ayyom – Qurbon hayiti bilan muborakbod etar ekanman, barchangizga mustahkam sog’liq-salomatlik, oilaviy tinchlik-hotirjamlik, sharafli va mashaqqatli ishlaringizda omadlar tilayman.

            Ezgulik va bag’rikenglik ramzi, hayr-saxovat timsoli, hamjihatligimizning yorqin ifodasi bo’lgan hayit kunlari qo’limizni duoga ochib, yaqinlarimiz va xalqimizga omonlik tilaylik. Yaratgandan yurtimizni, xalqimizni turli balo-qazolardan asrashni so’raylik!

 

Quvondiq SANAQULOV,

Navoiy kon-metallurgiya

Kombinati bosh direktori